里斯本地區小知識:小里斯本Belém及Benfica

Updated: Jun 13

講講下俾人BAN既區我都講到有啲悶,今日同大家講另外兩個地區,可能有唔少人都會聽過呢兩區。呢2個地方都係小里斯本既最外圍,但響離地死偽中產眼中既著眼點,就會有啲唔同。


📍貝林區Belem大航海時代的象征📍

貝林係小里斯本最西既位置(係西方唔好諗其他野)。相鄰Rio Tejo,冇地鐵到。只有火車、輕鐵、同巴士 (往Cascais既火車中途經貝倫)。


貝林塔係里斯本相當出名既一個景點(以前係監獄),附近又有文化中心、同埋修道院可以參觀。通常啲人去呢度附近遊覽都比較輕鬆,你沿住海旁一路行就可以經過好幾個景點。


1️⃣ 點解d人話貝林區Belém是有錢人區

  • 其實小編第一次聽呢個區,正正就係同當地地產AGENT傾計時傾開得知:「呢區係有錢人既區域之一」。不過同佢地傾得多計,慢慢我就會發現,其實全葡萄牙都好有錢.....因為好多有錢人區🤑

  • Anyway 咁佢又冇講大話既,呢區大多數既住宅都係獨立屋,越近海果邊就越多。我真係睇到留晒口水呀!不過,又係小里斯本區又近海、隔離又有火車站、仲要係獨立屋,大家都心中有數,佢會賣幾錢(除非係石屋級別既舊樓啦),否則離地極都係去望下算。

  • 由於貝林係一個相當有歷史既區份,比較少新型既apartment,相反會有相當多具歷史痕跡既樓宇(即係行樓梯)。

2️⃣ 如果叫我評分貝林Belém會係 交通 ⭐️⭐️⭐️ 歷史價值 ⭐️⭐️⭐️⭐️⭐️ 配套 : ⭐️⭐️⭐️⭐️ 商業價值 ⭐️⭐️⭐️ 地段 : ⭐️⭐️⭐️⭐️



📍Benfica賓菲加區📍

Benfica,小編玩WINNING時已經聽過佢既大名----賓菲加!(不過唔會點用佢黎踢咁解)

賓菲加響貝林北方,痴住貝林。呢區唔少又平又新既apartment。小編當初都有留意過呢區,因為一用個筆直€€€去SEARCH,有唔少RESULT都係響呢區既。賓菲加都有幾個地鐵站 (藍線-Linha azul,拋下書包先linha葡文既係線/line, azul即係藍色)🔜 遲啲小編有機會會講多少少里斯本交通圍住佢北邊,Colégio Militar/Luz, Carnide Pontinha:值得提提既係Colégio Militar/Luz站,呢度有個好大好大既shopping mall,香港人應該會好鍾意行。


Benfica平盤多要明白一分錢一分貨 咁但係大家都會明,又大又新又方便,但點解又會平呢?價錢好多時反映左啲野既。

  • 1️⃣賓菲加的確離里斯本市中心相對較遠

  • 2️⃣賓菲加鄰近既Amadora,係一個相對當地人覺得比較多草根既區份。所以小編個人意見,如果要投資果區,要留意位置最好離Amadora遠少少(即係近返小里斯本內圍)。

  • 3️⃣如果叫我評分賓菲加會係 交通 ⭐️⭐️⭐️⭐️⭐️ 歷史價值 ⭐️⭐️ 配套 : ⭐️⭐️⭐️⭐️ 商業價值 ⭐️⭐️⭐️ 地段 ⭐️⭐️


小編不定期,會加返個人評分去以前既地點小知識......

💡最後提提大家 :

  • Belém同Benfica都係好大嘅區域。故此如果見到Belém有平樓,有機會係幾偏僻,離海邊遠,需要揸車嘅地方。

  • 而Benfica有唔少係居屋Social housing,即係資助房屋,你買呢類物業係唔可以用黎申請GV既。

  • 呢區除咗地鐵,仲有Sintra線既火車經過,但有啲樓,其實離地鐵或火車站好遠。

本篇純屬筆者個人意見,讀者需自行評估個人投資風險及自行判斷🙂




葡萄牙香港人|葡萄牙投資移民|葡萄牙買樓|葡萄牙物業投資|移民葡萄牙|葡萄牙移民|經驗分享|Portugal Golden Visa

​葡萄牙移民|【葡萄牙香港人】移民買樓 80後家庭出走歐洲

  • Black Facebook Icon
  • Black Instagram Icon

© since 2015 by AdeusHK.com

5ae21cc526c97415d3213554.png