街。市。行程分享🐷
葡萄牙35萬投資移民都出左一段時間，由最初資訊少、個案少、中伏多，到今日開始成熟，亦多左成功個案，今日襯機會同大家分享一下。話就話35萬投資移民係翻新project，但入面其實都仲有幾種唔同既玩法，以下街。市。行程經歷後，所得既大約慨念：
1⃣獨立屋翻新🏚
之前係Porto既外圍比較多，因為里斯本你唔會買到10零20萬既獨立屋俾你去翻新。而家連Porto都開始少，要去到Setúbal、Évora⋯⋯等等再偏遠啲既地方先會有。
根據版友既分享，通常呢種係翻新項目：
1. 樓價由10幾萬到20幾萬不等
2. 再加上翻新重建費，10幾萬歐到20幾萬歐不等
呢種盤既好處，係成間屋都係你既，有機會你可以自己建立你自己既dream house。但唔好處，就係好多時都係響偏遠地區，你要預左好多時真係自用。風險方面相對低，因為間屋同地都已經轉左你名。走佬都好，你最多自己搵過個發展商幫你翻新，當然你文件要齊啦。但如果你買間屋個樓價係偏低，你翻新洗既錢會好甘⋯⋯
一般我會咁去評價（⭐⭐⭐星滿分) :
投資性 ⭐
實用性 ⭐⭐⭐ 成間house都係你仲想點？
風險 ⭐⭐
稀有度 ⭐
🔻🔻🔻🔻🔻
2⃣Apartment翻新（已經有分層登記）
有機會響里斯本市中心搵到，如Avenida等項目。呢種既玩法係，本身物業唔太殘，樓齡啱啱好可以玩到350K條路；單位數目亦唔會太多，一般10個內；發展商做既工夫唔洗太多，全橦油過、單位內翻新、執返好啲水電位等等；唔係扑剩4面牆；簡單黎講好似你間屋住殘左想執下佢咁。呢啲一般樓價係20幾到30萬，再加幾萬翻新費去湊夠35萬條數。
【有乜好處呢？】
單位本身有分層登記，即係你成交左之後，土地及單位已經係屬於你（同獨立屋一樣）。同時，萬一發展商有乜冬瓜豆腐，由於政府已經登記左你層樓係2X-30萬歐買返黎，你只需要俾幾萬歐去翻新就已經可以湊返35萬歐條數。
一般我會咁去評價（⭐⭐⭐星滿分) :
投資性 ⭐⭐⭐有機會響黃金地段搵到好嘢
實用性 ⭐⭐
風險 ⭐⭐
稀有度 ⭐⭐⭐但出現機率非常低, 同埋你精我都精, 飲杯竹葉青, 呢啲一出通常1星期內就會賣晒
🔻🔻🔻🔻🔻
3⃣ Apartment翻新（比例業權制）
同樣地有機會響里斯本市中心搵到，但呢種既玩法，好多時要將物業扑剩4面牆, 再重建。係！起完之後會好靚！但對發展商實力既要求相當高。一般整得呢啲project，好多時會整夠20個以上既單位，咁發展商先多肉食。同樣地呢啲一般樓價係20幾到30萬，加上幾萬翻新費去湊夠35萬條數。但記住，由於層樓未有分層登記，所以你擁有既業權係以％去記錄既。當然正常唔會影響申請者去申請GV啦，但相對風險係3個入面最高。
一般我會咁去評價（⭐⭐⭐星滿分) :
投資性 ⭐⭐⭐ 有機會響黃金地段搵到好嘢
實用性 ⭐⭐
風險 ⭐⭐⭐
稀有度 ⭐⭐
【翻新活動V.A.T.⁉】
除左買樓同翻新費外，行35萬條路有樣叫翻新活動既V.A.T. 乜嘢係VAT呢？由於你翻新, 有叫人做嘢，響葡萄牙係一個商業活動，所以政府會收你「增值税 Value Added Tax」。大部份係23%，亦有13%或6%。
傳送門 : https://zh.wikipedia.org/wiki/%E5%A2%9E%E5%80%BC%E7%A8%8E
葡萄牙既VAT傳送門 : http://www.worldwide-tax.com/portugal/por_other.asp
爛尾會好大鑊定⁉
順帶一提，由於太多人問35萬翻新項目既事。坊間會話乜嘢爛尾會好大鑊❓定唔知拖好多年都搞唔成果啲❓你睇完上面篇文，應該分析到邊種相對響呢種情況下會大檸樂啲🏚
再唔係？一個有經驗和好既律師，亦會睇得出和提醒你以上既風險。以上係我地從各方面所得資料，整理而成。
