葡萄牙之所以出名,以前(筆者中學時)係因為黃金一代費高,雷哥斯達呢批球星,到之後既老逗(摩連奴),或者比較近期既C朗.
但而家唔少香港人對葡萄牙既認識,都係同"黃金"呢兩個字有關,不過就係"黃金簽証"(Golden Visa)
黃金簽証係葡萄牙政府為左吸引外來資金去本國投資而實行既一個投資移民計劃.
點解要吸引人用錢黎移民呀?咪因為冇錢囉,好現實嫁呢個世界.
隨住每個國家對資金既渴求程度,對投資移民既資金需求同投資項目亦各有不同.
如美國投資移民計畫EB-5只需要50萬美金(390萬HKD @7.8),但需要響指定地區發展指定生意,唔係話你覺得NY旺,攞50萬美金去開間餐廳人地就肯收你.可能要你去葛咸城犯罪率最高既地區開間汽車維修店.當然如果你有錢多亦可以丟1球美金,彈性就會大啲.另外你既生意必需要你創造10個俾當地人既就業職位.對鍾情磚頭既香港人黎講實在唔太友善.
英國既投資移民計劃,印象中以前好似1球英鎊(1020萬HKD @10.2).要買英國既股票基金國債等等既資產,唔可以用晒黎買房地產.呢一樣野對於傳統鍾愛房地產既香港人又係一個唔太理想既感覺.更何況筆者執筆之時呢個計劃好似都已經更新左做2球英鎊.
加拿大既投資移民計劃2014年2月時俾某國玩壞左(大家自己可以GOOGLE新聞,91%既申請者都係某國既人).所以一刀切唔再批,連已經入左紙等緊批既人都彈返晒轉頭.2018年好似開返個新既計劃,但加返語言要求,要求金額係80萬加紙(480萬HKD @6.0),同埋指定特定省份(如魁北克省等).要投資去加拿大政府既移民基金,即係又冇磚頭份
睇左咁多個國家,好似冇個俾你買磚頭喎?
西班牙投資移民計劃,50萬歐羅(455萬HKD @9.1)買當地物業可獲得永久居留身份(PR)
葡萄牙既黃金簽証就係50萬歐羅(455萬HKD @9.1)買當地物業可獲得永久居留身份(PR),或35萬歐羅買特定地區物業亦可(需翻新----用下腦都知,人地政府想你黎幫佢整返靚個市容啦 ).
希臘投資移民計劃,25萬歐羅(228萬HKD @9.1)買當地物業可獲得永久居留身份(PR)
仲有愛爾蘭,匈牙利(不過匈牙利果個30萬國債投資移民計劃好似收夠錢CUT左了)
云云眾多國家,點解最終筆者一家選擇左葡萄牙呢?下一篇我再向大家分享心路歷程
📷